Sarritan, argiztapen-mota hori LED diodo urdinen gainazalean jarritako eta gailu horiek igortzen duten argiarekin elkarreragiten duten fosforo horiak erabiliz lortzen da. Fosforo horiek oxido mistoen eta dopatuen konposaketa konplexua duten partikula batzuetan oinarritzen dira. Formulazio horiek, askotan, oso tenperatura altuan (>1600 ºC) egoera solidoan dauden erreakzio konplexuen bidez lortzen dira, eta horrek fosforoen neurriak mugatu egiten ditu 0,5 eta 5 mikra bitarteko tamaina batera, eta, beraz, baita haien propietate lumineszenteak ere; ondorioz, oraindik ez da lortu eraginkortasun luminiko teorikoaren maximora iristea. Partikularen tamaina maila nanometrikora jaitsiz gero, konfinamendu kuantikoari esker, nanofosforoak lortuko lirateke, propietate berdingabeak eta hobetuak dituztenak; eta, hain zuzen, NOVOLED proiektu hau material horien garapenean bideratuta dago.
Bestalde, fosforoak gordetzeko erabiltzen diren estalduren eta fosforoen beraien degradazioak igorritako argiaren kolore-tenperaturaren ezegonkortasuna eragiten du, eta, ondorioz, argiaren kalitateak behera egiten du denborarekin. Horri igorpenean osagai gorririk ez egotearen ondoriozko mugak gehitu behar zaizkio; horrek erreprodukzio kromatiko baxuko indizea dakar, koloreak behar bezala hautematea eragozten duena.
Hala, NOVOLED proiektuak Lurederra Zentro Teknologikoaren eta Nafarroako Unibertsitate Publikoaren arteko lankidetza proposatu du, lehen azaldutako arazoari aurre egitea lortzeko.
Proiektuaren lehenengo urtean aurrerapen ugari nabarmendu dira:
✓ Flame Spray Pyrolysis (FSP) bidezko produkzio-prozesua optimizatu da, igorritako argi zuriaren osagai gorria osatuko duten YAG:Ce konposizioetarako zein dopatzaileak dituzten formulazioetarako. Prozesuaren bideragarritasuna berretsi da, bai nanopartikulen konposizio konplexuak ekoizteko, bai ekoizpen hori maila handiagoetan eskalatzeko.
✓ Karakterizazioa osatu da nanopartikula horien ikuspuntu optikotik, horien erabilgarritasuna berresteko.
✓ Nanopartikulak LED diodo aldatuek igorritako argiarekin elkarrekintzarik izan gabe gordetzeko eta babesteko gai diren matrizeak hautatu dira.
✓ Argia urdinetik zurirantz modulatzea lortu da, garatutako YAG:Ce-ko nanofosforoaren proportzio desberdinen erabilerari esker.
✓ CdSe-ren QDetan oinarritutako dopatzaile gorriak aukeratu dira; horiek mekanikoki sortu eta txertatu dira garatutako YAG:Ce-ren konposizioan. Nahasketa hori duten LED diodoen argiaren igorpena zurirantz hurbiltzea lortu da.
Aipatzekoa da, halaber, bazkideen arteko lankidetza estuak NOVOLED proiektuaren baitan proposatutako erronkak lortzea ez ezik, oxido metaliko konplexuetan oinarritutako nanopartikulak diseinatu eta ekoizteko ikerketa-lerro berriak irekitzea ere ahalbidetu duela, material optoelektroniko berriak bultzatzea ahalbidetzeko interesgarriak izan daitezkeenak
